Adivinando na Acuerdo de Paz

El gobierno local ta hace preciso para incluí na propuesto plano de paz el opposition del ciudad contra inclusión na nuevo territorio que el gobierno de Manila el dale na MILF.

Hasta este maga tiempo no hay hace claro el gobierno si cosa promesa ya dale este con el MILF durante ila meeting alla na Japón del otro dia.

Pedazo pedazo lang ta sale palabra desde gobierno si cosa sila ya promete, pero claro que el gobierno de Manila el dale lang cosa ta pidi el m-i-l-f aqui na Mindanao.

Ta pidi daw el MILF aquel ta habla substate, que quiere decir un sistema de gobierno que hende daw independiente y separao na pilipinas.

Actualmente el significación de este substate bien trambulicao para el quien quiere estudia el significación de este.

Poco confundido tamen el pueblo si cosa este quiere decir con el quien no quiere queda parte de otro nación que el crea aqui na Mindanao.

Pero ansina ya ese cosa ta pasa na pais de aton.

El alcalde celso lobregat ya pidi daw con el maga negociador del gobierno que consulta anay con el pueblo antes de dale de ila counter proposal na m-i-l-f. Ya pretende gane consulta maga negociador na Zamboanga pero no hay abrí na publico de ila consultación y depuse ya habla falta sila tiempo para hace consultación.

Y depuse , acabar sila somete de ila proposal con el MILF na Malaysia, hende daw sila dale con aquel ta pidi substate.

Procura kita acorda si ta cree ba el Manila con el cosa quiere el zamboanga aqui na Mindanao.

Durante tiempo del presidente ramos, ya crea siempre sila con el s-p-c-p-d aunque contra con este maga vivientes del ciudad.

Durante presidente del ahora congresista Gloria Macapagal Arroyo, ya hace era sila pasa con el Memorandum of Agreement on Ancestral Domain.

Mayor parte del ara na Zamboanga no sabe si cosa ya ofrece el antes Presidente Corazon Aquino con el maga lideres del MNLF. Aquel tiempo ya deja el Presidente pacía y bulcha con el maga rebelde na entero Mindanao. Ya ofrece tamen sila con el MNLF el entero Mindanao.

Durante el final negociación con el MNLF alla na Manila del Enero, 1987 - tiene cosa ya ofrece el gobierno de Manila con el MILF pero mucho no sabe si cosa aquel ofrecimiento ya dale si Tita Cory na rebelde.

Y mucho pa alli maga arreglo de ila na maga rebelde que seguro asta cuando el esta escondido na publico o lejos na ojos para del ta queda na Mindanao.

No debe el maga lideres na Zamboanga pensa cosa lang el sucede mañana.

Pensa sila si cosa ya pasa del maga tiempo de antes y si cosa el pasa na maga meses que viene.

No quita esperanza que el Manila pone atención na de aton pedida.

Tiene esos de ila agenda que diferente con el agenda del ciudad de Zamboanga.

Read More

Maga carero chofer de tricycle

Este problema de sobra cobrada pasaje del maga chufer de triciclo ya dura ya como un enfermedad na ciudad.

Hende lang este un ordinario enfermedad siendo como un incurable ya este enfermedad na Zamboanga.

Ya dura ya el reclamo del publico contra con este maga chofer de triciclo.

Ya dura ya este maga triciclo ta cobra sobra pasajes na de ila maga pasajero.

Segun na fare matrix talli pilit na espejo del maga triciclo debe el primer pago na tricycle para el primer kilómetro solamente ocho peso.

Y despues el omento allí dos pesos casa kilómetro.

Pruba daw tu mam o ser munta triciclo y paga ese ocho peso y mira si que modo de abusao el queda el chofer.

Ya man anad ya ese maga chofer cobra sobra siendo sabe sila na montonadas de ila y maga voto de ila hende canila mete maga elegido oficiales del ciudad.

Por eso, ya pensa el maga chofer de triciclo que maga sagrado sila animal aqui na ciudad.

Ese fare matrix ta pasa lang por nada maga chofer. Y nunca esos conforma recibí pago siguiendo con el fare matrix.

For ejemplo el distancia desde este estación para Talon Talon Loop hende man lampas de cuatro kilómetro.

Y si sigi kita na fare matrix el pago alli solamente ocho peso na primer kilómetro y dos dos peso o seis perso para el que sigi tres kilómetro.

En total el pasaje para alli na Talon Talon Loop sale aqui na centro del pueblo hende pasa na 14 peso one way. Y puede tamen daw saka el 20 por ciento descuento na pasaje si el pasajero estudiante o señor citizens, según na markada alli na tricycle.

Nah ,,, quien man triciclo recibí ese cantidad para ese distancia. Nada.

El cobra el tricycle alli, depende na cara del chofer no menos de 25 peso y tiende de esos el cubra 50 peso.

El resulta como de doble o triple el cobrada del maga chofer.

Y el manda tu para con el chofer, el hablar to para donde tu, el hable ese chofer, "cuanto tu dale..?"

El pasajero ta paga pasaje y hende ta dale sen con el chofer.

Pero otro ya este enfermedad na ciudad.. y difícil con este mal costumbre puede pa borra aqui na ciudad...

Read More

Maga nuevo barrio oficial

Con ansias ya seguro el maga elegido o reelegido oficiales na maga barrio para cumplí de ila maga obligación para compli deila maga promesa con el votante ya pone canila na puesto durante del mas reciente elección.

Para conel daan ya na puesto y ya gana otro vez para sirve otro tres año termino, seguro no necesita mas sila enseñanza acerca de ila maga trabajo y obligación.

Seguro este maga daan ya elegido o reelegido oficiales debe ya lang cambia el de ila actitud na servicio para na de ila cada y cual comunidad.

Tiene ta oí kita alli maga daan oficiales quien según abusao o hende ta hace de ila maga trabajo.

Si por ejemplo ya gana gane sila otra vez na elección, debe seguro sila alinea otra vez de ila maga actitud maga con el de ila maga constituyente na comunidad.

El servicio como servidor na maga barangay hende simple obligación siendo el barrio amo el primer sistema de gobierno con quien el ledia el maga residente na un lugar.

Pero para con el maga nuevo ya gana na elección, tiene estos que pasa un training o entrenó para sabe sila si cosa de ila maga obligación.

No kita habla que sabe ya sila de ila maga responsabilidad como kagawad o barrio capitan si no hay pa sila serví en este maga puesto.

Talli el departamento de interior y gobierno local que puede dale seminar con el maga nuevo oficiales para hende el pueblo man lugi con el sueldo el paga sila con este maga oficiales na barangay.

Debe tambien el DILG hace claro con el maga oficiales del barrio que de ila puesto hende cosa personal.

Todo el servicio de este maga oficiales del barrio para na bien del barrio.

Tiene alli ya sabe kita,, ta pensa ya man balus y sabotaje conel maga nuevo elegido oficiales.

Tiene daw alli un secretaria na un barangay quien quiere destroza o ya destroza ya maga papeles y documento del barangay siendo suyo favorito candidato no hay gana durante el elección.

En este daw manera el puede ele manda sufrí con el maga nuevo elegido oficiales quien ya gana contra suyo maga palanga.

Na suma total, maga oficiales na barangay debe mira firme y solamente con el bienestar del de ila cada y cual maga comunidad

Read More

Preparación para Año Nuevo

Cada vez ta atraca el fin del año de apuro ya el preparación del maga vivientes na ciudad para el celebración de ano nuevo.

De dos clase el preparación del maga vivientes para el celebración de año nuevo aqui na ciudad.

El primero na lista del maga quien tiene y puede amo el preparación del maga comida para come al entrar el nuevo anio 2011.

Talli maga creencia si cosa clase de comida debe come y no debe come.

Mayor parte de este maga creencia no hay verdad y el afecta canaton na maga años que viene.

El departamento de salud ta advertí solamente que controla el comida este maga dia.

Debe daw tambien mezcla maga fruta y gulay con el maga comida de carne y otro pa.

Y debe descansa ya si cansao durante el celebración.

El segundo na lista del quien ta celebra amo el reventada del maga reventador y otro pa maga ta habla sila pirotécnico.

Hende man ese parte del religión para hace reventa maga reventador siendo este practica ya copia diaton maga canunuan con el deila maga tata y nana estaba na otro maga lugar comoChina.

El explosión de este maga reventador el arría daw lejos con el maga mal espirito na de aton maga vida.

Por eso talli tampa mas suena na reventada este maga dia.

Antes el sunor del maga reventador hende bien fuerte como el ta reventa este maga dia.

El hacida de ese maga reventador como maga triangle y otro pa.. maga hacida de mano y por eso pa bueno lang pone mucho pólvora para fuerte el sunor.

Puede man era man alboroto kita sin uso del maga reventador.

Pero este uso de maga otro manera para crea fuerte sunor na istoria ya lang ese,, siendo talli maga los demas quien quiere y puede compra maga fuerte reventador y maga iguales producto.

Debe lang kita esta con cuidao y evita con este maga explosión.

Read More

Maga favorito tan viajé

Hende pa ta acaba este asunto del viaje del maga concejales para na Manila para atende con un convención del liga del maga concejales del maga ciudad na pais.

Ya aproba el gobierno local solamente el viaje del maga concejales del administración quien ya vota daw afavor con el budget del ciudad.

No hay daw aproba el alcalde el viaje del quien ya opone con el budget.

Tiene alli ta cuestiona si por que debe el vice alcalde amo el aproba el viaje del maga concejales siendo separao agencia el consejo local con el city hall.

Un periódico ya habla que el secretario del departamento de interior y gobierno local si Jesse Robredo ya habla na un entrevista que puede aproba con el viaje del maga concejales el vice alcalde del ciudad.

El vice alcalde que ta encabeza con el rama legislativo del ciudad ya habla que hende ele puede aproba o seguí con el palabra di secretario robredo si hende con ele dale un escribido directiva desde Secretario Robredo.

Ta mira el publico con este como butajan cuerpo na asunto.

Mientras hende pa recibe el vice alcalde con el documento desde DILG hende ele aproba con el viaje del maga concejales na oposition.

Para ver llega aquel documento ya akaba ya el convencion allá na Manila.

Tiene ta habla que aquel convención entendido para todo maga concejales del maga ciudad na pais.

No hay alla habla que atende con aquel solamente maga concejales afavor con el maga movimiento desde city hall.

No hay habla que maga na oposición- pero elegido maga concejales- hende puede anda atende con el convención na Manila.

Tiene tamen ta habla que el gasto del maga concejales si anda sila na Manila estaba na pondo del ciudad y hende na bolsa personal del maga lideres aqui na ciudad.

El oposición parte del sistema de democracia na pais y hende kita ta maneja gobierno donde uno lang ta canta y todo lang ta canta con el un cancion.

Ta oye kita maga llamada que man junto junto kita para progresa diaton ciudad.

Tiene quien ta habla que este asunto de viaje para na Manila amo un clase de venganza political.

Ojala pone kita na corazon este llamada de unidad para del ciudad...

Read More

Tiene ta esconde na pantalan

Como espantao kita na historia que el polis allí na pantalan ya sangga o intrevini con el de media para hace de ila maga trabajo alli na facilidad.

Ta habla kita espantao siendo ese ansina maga situación ta sucede solamente durante ley militar donde el derecho del prensa amarao.

El pueblo no hay tiempo para busca el punta y pono del maga cosa ta sucede na ciudad o na un lugar.

Y por eso, ta dale el maga civilizao gobierno con el na prensa o na media el derecho para escribi historia o reporta con el cosa ta pasa na comunidad.

Asegun que ya llega enantes aquel maga victima de human trafficking desde tawi tawi.

Pero el polis na pantalan ya sangga daw con algun de media para pregunta cosa debe pregunta con el maga victima.

El derecho del publico para sabe el verdad ta deja sila na hombro del maga ta trabaja na media.

Hende man todo puede anda pregunta pregunta con el maga victima de abuso, y por eso maga de media ta hace ese trabajo y responsabilidad.

Talli na congreso ahora el ta habla Freedom of Informacion Bill.

Ese propuesto ley el dale bastante poder para conel media busca historia y reporta el istoria y el verdad conel publico ta sirve sila.

Ese era propuesto Freedom of Informacion Bill el dale bastante poder con el publico para sabe cosa ta pasa na gobierno.

Tiene ves ta sobra ya el gobierno.

Por ejemplo, tiene miedo el gobierno que levanta el publico si ta sobra ya sila na manejada del gobierno.

Por eso ta prohibí el gobierno con el publico para carga fusil y ta deja lang con el maga criminal carga maga armas de fuego.

Tiene na gobierno mucho cosa quiere esconde desde na ojos del publico, y por eso talli el maga ta sangga con el na media hace de ila maga trabajo.

El pueblo el puede asegura que ta recibí sila el que se debe gobierno debe sila tiene y abierto el puerta del ta goberna con el ciudad.

Por eso vicia kita para hende abusa el na poder con el derecho del publico para sabe el verdad

Read More

Librao ya el nars

Librao ya si Maricris Cuartocruz desde mano de suyo abductor.

Ya esta si Maricris por 76 días na mano del bandido que hasta ahora no sabe si quien o de donde puta hiede del region.

Que quiere decir, por 76 días, no hay ele na abraso del gobierno que tiene mandato para protege con el maga vivientes del ciudad.

No hay con ele dale ayuda el gobierno por este maga 76 días, aunque suyo maga familia ta paga impuesto con el gobierno para protege con el pueblo incluido ya con ele.

Igual como tiene del maga victima de abducción maga familia del maga victima ya pidi que no mas (ya lang) entremete el gobierno na negociación para libra con el maga victima.

Sabe ya man todo, que este abducción un grande negocio ya aquí na región.

Este maga abductor maga armado persona quien quiere lang man la vida pero amo gane en aquel ta habla kita mal manera de busca vida.

Na otro lao, talli tamen miles y miles de maga bien armado persona del gobierno, quien ta mantene el publico para protege canila.

Talli tamen maga oficiales del gobierno quien ta lleva mandato para protege con el maga vivientes del pueblo.

Todo estos maga na gobierno bien armado, bien educao, y ya pasa maga entrenó para protege con el ciudad.

Pero, como ya abla kita, ya pidi el familia di maricris que no mas ya entra el gobierno na negociación.

Alegre todo este dia que libre ya si maricris.

No hay kita oye yan alboroto que el gobierno el hace lagas con el maga abductor.

No hay kita mira algun maga persona alli carga maga placard o tarpulin que ta promete que el protege sila con el ciudad contra con este maga bandido.

Y siendo no hay grande movimiento para curta ya este clase de negocio,,, no mas kita estreñía si el continua lang este ta habla kita cycle de kidnapping aqui na ciudad y na region.

No puede kita habla maga mal palabra aqui na de aton comentario para este dia..

Read More

El Apoderoso Ciudad

Por fin, ya conseguí ya el deseo del ciudad para apodera con el isla de Santa Cruz.

Del otro día ya puede ya firma allá na Manila un acuerdo para puede ya maneja el ciudad con el isla.

Desde antes, ese isla de Santa Cruz ta atrae con el maga turista de otro otro lugar.

Como atractivo ese isla allí lang adelante del de aton pantalan.

Cerca lang el distancia de ese para na ciudad siendo ta llega lang alli cuanto minuto el viaje para na isla.

Bien limpio el agua alli alrededor de Santa Cruz siendo fuerte el corriente del agua allí.

El isla talli na mar del ta habla Basilan Straits que amo el pasada el agua desde el mar de Sulu para na mar de Celebes.

Siendo fuerte el corriente allí limpio el agua allí para el quien quiere baña.

Tiene tamen un especial clase de arena allí na Santa Cruz.. Por eso conoce con ese isla como un isla donde rosas el arena. Y por eso un atracción allí na isla el ta habla “pink sands.”

Ese Pink Sand resulta del ya man pupuh maga red corral na lugar.

Y siendo tali ya de aton ese isla, considera quita con el siguiente.

Arregla kita conel diutay pantalan allí na Paseo del mar y debe tamen construí un diutay pantalan o para donde pundia el maga banca allá na isla.

No hay poso o agua fresco allá na isla y por eso, debe allá busca manera para asegura supply de agua para uso del quien anda man picnic o baña na isla.

Debe tamen paga allí aquel maga lifeguard para segura que no hay allí quien el man lumus na mar.

Y debe pone allí lifeguard aquel sabe nada y sabe salva vida y no con esos dale otro trabajo como ta sucede allá na Pasonanca.

(Allá na Pasonanca, yan lumos y ya muri un estudiante na swimming pools siendo el salvavida guardia hende ta visia con el pool, sino talla ta barre basura na otro parte del lugar)

Debe tamen allí firmi tiene maga polis o soldado con el de ila maga fuerte y corre speedboat, siendo ya sucede ya alli kidnapping.

Del anio 1976. ya olvida ya kita ,,, un nuevo casao maridable Japón ya anda baña alli na isla y maga armado persona ya rebata con el japonesa Yoko Seki alli na Santa Cruz.

Por eso fuera de invita kita maga turista para logra o alegra alli na isla, no kita olvida maga manera para evita tristeza aqui na ciudad.

Read More

P21M para compone P67M edificio

El gobierno local el gasta el cantidad de veinte uno millones de pesos para compone con el defectivo edificio del consejo local.

Según que ya gasta ya el gobierno el total de mas de 67 millones de peso na edificio.

El problema allí amo que ya descubrí maga ocupante que tan tulu ya ese edificio y después de todo ya mira sila que ta raja ya algún parte de ese edificio.

Ya queda ya grande el controversia acerca construcción de ese edificio del consejo local.

Y después de maga chequeada del edificio ya decidí ya el gobierno local para compone con el edificio.

Na de ila calculación puede ya el cantidad de nueve punto seis millones de peso para cambia con el aka cuatro piso de cemento y pone ya lang allí techo de sin.

Pero el temblor y tsunami na Japón ya dale idea con el gobierno local para compone ya con ese edificio completamente.

Por eso na palabra pa de ila y de aton, si compone man con ese edificio, compone ya de deberasan.

No importa el gasto.

El importante amo que el puede pa el pueblo usa con ese edificio y evita ya kita peligro el vida del quien ta usa con ese consejo local.

Read More

Dormido el Tercer Distrito

Hende pa ta acaba el asunto para establece el tercer distrito para na ciudad de zamboanga.

Del año 2008 ya man alboroto ya ese asunto de tercer distrito siendo según el populacion aquel tiempo bastante ya para crea otro distrito.

Cada distrito na cámara baja necesita solamente el populación de 250 miles de vivientes.

Del año 2008, bastante ya el populación siendo na calculación de populación ya pasa ya de 750 miles vivientes el populación na ciudad de zamboanga.

No hay pursigi aquel plano para aproba un ley para del tercer distrito aquel año 2008.

Actualmente butajan cuerpo allá na consejo local acerca este asunto.

Por fin, si ta acorda kita, el consejo local ya consulta con el deila maga constituyente y mayoría deila ya suporta con el creación del tercer distrito.

El congresista María Isabel Climaco ya hace tamen suyo consultación na suyo distrito y junto con el suporta del consejo local, ya planta ele un propuesto ley na cámara baja.

El congresista Erico Basilio Fabian del distrito dos ya habla que necesita pa ele hace suyo tamen consultación na distrito dos.

El problema ya termina ya el termino del camara baja aquel maga tiempo. Talla el promesa del maga lideres na ciudad que continua sila coneste plano na anio 2010.

El ya nota kita amo que preocupado el maga político de aton del otro año elección,, y por eso ya esta dormido este proposición.

El otro mes, el maga concejales na menoría na consejo local ya planta resolución para revive el plano para crea el tercer distrito del ciudad.

El mayoría concejales del Laban ng Democratikong Pilipino y Adelante Zamboanga ya man contra con este propuesto.

Fuera de votar contra con el propuesto revivida del plano para crea con el tercer distrito, maga concejales na mayoría na consejo ya man recall el resolución del año 2008 que ta suporta con el tercer distrito.

Y allí ya muri sin esfuerzo del plano para crea con el tercer distrito na ciudad.

El alcalde del ciudad y suyo maga compartido na LDP y Adelante Zamboanga tiene deila razón por que contra sila con el creación del tercer distrito.

Seguro no quiere sila que adelanta el ciudad.

El maga na menoría tiene tamen de ila razón si porque favor sila con el plano.

Natural, ambos lao el dale de ila maga razón na asunto.

El pueblo, cosa ta pensa????

Read More